Элчин сайдын яамдууд мөнгө байхгүй гэдэг шалтгаанаар иргэдээсээ нүүр буруулдаг


Сүүлийн үед гадаадад сурч, амьдарч байгаа манай улсын иргэд гэмт хэргийн золиос болж, хүчирхийлэлд өртөж байгаа тохиолдлууд олонд ил болсоор байгаа. Угтаа бол хохирч байгаа иргэдийн эрх ашгийг гадаадын улс, орнуудад суугаа Монголын Элчин сайдын яам, Консулын газар хамгаалалтдаа авч, тэдэнд дэмжлэг туслалцаа үзүүлэн, эрхзүйн хувьд зөвлөх, эх оронд нь буцаах ёстой. Гэтэл хөрөнгө мөнгө байхгүй, дэмжлэг үзүүлэх боломжгүй гэдэг шалтгаанаар иргэдээ хүний нутагт ад шоо үзэж, нүүрээ буруулдаг гэнэ. Шуудхан хэлэхэд, Монголыг төлөөлөн гадаадын оронд суугаа дипломатууд монголчуудынхаа эрхийг хамгаалж чадахгүй, сул дорой байгаа юм. Иргэнийхээ эрхийг нэн тэргүүнд тавих нь гадаадад сууж, улсаас цалин авдаг дипломатуудын хуулийн өмнө хүлээсэн үүрэг байдаг ч ажлаа хийхийн оронд авгай, хүүхдэдээ газар орон үзүүлж, тансаглан амарч байгаад хугацаагаа дуусгадаг байна. Охиныхоо эцгийг дагаж Филиппин улс руу яваад хүүхдээсээ хагацсан Т.Аятунгаа бүсгүй хэвлэлийнхэнд хандаж, түүний нөхөр Т.Аятунгааг хар тамхины хэрэгт хутгаж, зургаан сартай охиныг нь авч зугтаасан тухай мэдээлэл олныг шуугиулсан. Анх Интерполын цахим сайтад мэдээлэл тавигдахаас өмнө Т.Аятунгаа болон түүний ээжийн талаар хэн ч мэдээгүй.

Мэдэх ёстой, Филиппин улсад суугаа Монголын Элчин сайдын яам, Консулын газар энэ хэргийн талаар огт мэдээгүй байсан билээ. Эцэст нь Т.Аятунгаа охиноо хайж өгөх хүсэлтийг Гадаад харилцааны яам, Консулын газарт тавьсан ч тэрээр өнөөдрийг хүртэл хариултаа авч чадаагүй яваа. Үүнтэй холбоотойгоор Филиппины төрийн өндөрлөгүүдийн Монгол Улсад хийх байсан албан ёсны айлчлалууд ч цуцлагдсан удаатай. Энэ бүхэн тухайн улсад суугаа дипломатууд ажлаа хийгээгүйгээс болсон хэрэг. МУ-аас өдгөө Филиппин улсад Онц бөгөөд бүрэн эрхт Элчин сайд Б.Батхишиг гэгч ажилладаг аж. Дараахан нь гарсан бас нэгэн хэрэг бол Нигер улсад нөхрийнхөө дарамтад байсан Энхмаа бүсгүй. Гэрээсээ оргон зугтааж, эх орондоо ирэхийг хүссэн түүнд туслах хүн байгаагүй. Учир нь, Нигер улсад Монголын Элчин сайдын яам байхгүй учир Арабын бүгд найрамдах Египт улсад байгаа Монголын Элчин сайдын яаманд хандсан юм. Гэтэл тэд “Мөнгө байхгүй” гэсэн шалтгаанаар Энхмаа бүсгүйд туслаагүй юм. Тус улсад суудаг Онц бөгөөд бүрэн эрхт Элчин сайд Б.Одонжил нь 2012 оны хоёрдугаар сард томилогдсон бөгөөд төрийн албанд 28 жил зүтгэсэн туршлагатай нэгэн, энэ ажлыг хийхэд тэнцэх хүн хэмээн өөрийгөө тодорхойлж хэвлэлд ярилцлага өгч байсан удаатай. Гэвч тэрбээр өөрийг нь Монголын төлөөлөл хэмээн зориод очсон зовсон бүсгүйд хөрөнгө мөнгө байхгүй гэсэн шалтгаанаар туслаагүй аж. Олны дунд шуугиан тарьсан хоёрхон тохиолдлоос Монгол Улсыг төлөөлөн гадаадад суугаа Монголын дипломатууд ямар үүрэг хүлээдэг вэ гэсэн асуулт эндээс урган гарна. “Монгол Улсын дипломат албаны тухай” хуулийн 7.1.5-д Дипломат төлөөлөгчийн газрыг чиг үүргийг:  “Хилийн чанадад МУ-ын иргэн хуулийн этгээдийн эрх, хууль ёсны ашиг сонирхлыг хамгаалах, тэдэнд эд материал, санхүүгийн дэмжлэг тусламж үзүүлэх” хэмээн тусгайлан зааж өгсөн байдаг. 

Гэтэл энэ хууль мөрдөгдөх нь битгий хэл гадаадад суугаа Монголын Элчин сайдууд, дипломатууд өөрийн улсын иргэнийхээ эрх ашгийг хамгаалах идэвхи, зүтгэл байхгүй байна гэдгийг Хүйсийн тэгш эрхийн төв, Хүүхдийн төлөө газрууд ч шүүмжлэн хэлж байна. Гадаадад халаасандаа нэг ч төгрөггүй, амь нас нь дээсэн дөрөөн дээр дэнжигнэж байгаа монголчууд зөвхөн эх орондоо л буцахыг хүсч Монголын Элчин сайдын яамандаа ханддаг. Харин иргэдэд туслах Элчин сайдуудын ажлын явц маш удаан гэнэ. Тэднийг хуралдаж, бичиг цаас хөөцөлдөж байх хооронд аврал эрсэн Монголын нэг иргэн эрсдэлд орох  аюултай юм. Орж ч байсан удаатай. Гэтэл гадныхан  хүний нутагт хүндхэн байдалд орсон өөрийн иргэндээ мөнгө төгрөг, бичиг цаас гэж мунгинах биш шууд л авралын гараа сунгаж иргэнийхээ эрхийг нэн тэргүүнд тавьдаг билээ. Үүнийг тодруулбал өөр бусад орны гадаад улс дахь Элчин сайдын яамдуудад иргэндээ яаралтай туслах санд хөрөнгө мөнгө төвлөрсөн байдаг ч монголчуудын хувьд Элчингээр томилогдож, хилийн чанадад дипломатаар ажиллахыг зүгээр л нэг урт хугацааны хангамжтай амралт гэж ойлгодог бололтой юм. Үүн дээр ч төр, засгаас тавигдах хяналт гэдэг зүйл алга байна. Цаашдаа Элчин сайдууд, Консулын ажилтнууд хүнд суртал гаргаж, хөрөнгө мөнгөгүй гэсэн шалтгаанаар Монголын өшөө олон иргэнийг хохироох магадлал өндөр байгааг энэ мэдээллээр уламжилъя.
Сэтгэгдэл
Нийт:
Нэр:
Сэтгэгдэл:
Одоогоор сэтгэгдэл бүртгэгдээгүй байна.

Бүх эрх хуулиар хамгаалагдсан. @www.wikimon.mn